بنـــــــــــــــــــــــــــــــــــــــت رجــااال

بنت الرجال تشوم عن درب الانـذال
وتبعـد جنابـه عـن دروب الرديـه

ماهي فـي درب العشاشيـق تختـال
ولاهو طموحه يـوم تصبـح خويـه

ولاهي بتشرى بشحن هاتف وجـوال
ولا لا ولاتشـرى بعطـر وهـديـه

ولاهي من اللي كل يوم(ن) لها حـال
وعنده من الاصحاب عشـره وميـه

اليوم مـع هـذا بـلا شـك وجـدال
وبكـرى مـع هـذاك تعقـد يـديـه

هذاك ترسل له من الحـب مرسـال
وغيـره معاهـا بالمسنجـر سريـه

تضحـك عليهـم واتغنـج وتحتـال
وهم ياحرام يجـون باجـزل عطيـه

أحد(ن) تبي منـه أسـوار وسلسـال
وأحد(ن)فواتـيـره يـسـدد هـديـه

وأحد(ن) لها يحول ألوف(ن) من المال
وتضحك وهـي تقـول دينـك عليـه

وش ينفعـه لاقيـل بالأسـم رجـال
والبنت تلعـب فيـه صبـح وعشيـه

أنا اشهد انه لو لبس بشـت وعقـال
ماجملـه بشتـه بعـيـن اجـوديـه

ووش عاد لو هو مالك قصور واموال
واسمه مسجل شيـخ وسـط الهويـه

الشيخ مـن بيتـه للاجـواد مدهـال
ماهو بشيـخ فلـوس لارحـم حيـه

وبنت الرجال اللي تعزوى بها رجـال
عينه علـى الاشبـاه ماهـي شقيـه

مايشوق بعيونه سوى طيـب الخـال
اللـي يدينـه مـن عطاهـا نـديـه

عينه على الطيـب تناظـر وتختـال
ولـد الرجـال اللـي علومـه غنيـه

ولـو كـان مايملـك بيدينـه ريـال
ويـده مـن كنـوز الدراهـم خليـه

يكفي ألى من مـر ذكـره بالامثـال
والكـل قـال ونعـم ياحـي حـيـه

ألماسة(ن) ماكل مـن هامهـا طـال
وكل(ن) يبيهـا بـس ماهـي دنيـه

مصيونة(ن) عن قول حاسـد وعـذال
ومحشومة(ن) عن درب ذم وخطيـه

تخاف من هرج(ن) يجي فيه محتـال
حكيه شهد مدسوس فـي سـم حيـه

الطرف يغضي غصب لاشاف رجال
والعيـن مالـه بالنـظـر مقـدريـه

هي مهرة(ن) مايعسفـه كـود خيـال
ذيب(ن) سنافي عز من هـو خويـه

حر(ن) شلع مابين هامـات وجبـال
له نظرة(ن) تـرث بالاعمـاق كيـه

على النقى يصبح لهـا فـي وظـلال
قـدام كـل النـاس ماهـي خفـيـه

بوضح النهار بدون ريبـه ولا اقـوال
الصـح واضـح والخطيـه خطيـه

هذي هي اللي تنشرى بغالـي المـال
ويرخص لها الغالـي وتشـرى يديـه

وهذي تساوي بعزتـه ألـف رجـال
وش عاد لـو هـي بالمسمـى بنيـه

وهذيك ماتبغـى ولـو مهـره ريـال
ولااحد(ن) يبيها كود خبل(ن) دهيـه

سبحان من هو فرق الناس بااشكـال
وألوان وأفعـال(ن) وحسنـى وسيـه

ومثل مافيه رخوم بالنـاس ورجـال
أيضا بنـات النـاس ماهـن سويـه

مراااااااق لي .......
وتقبلووو تحياااااااااااتي

يعطيك الف عافيه ع الموضوع

هذا كلام مايطلع الا من واحد كبير والكبير الله

عيون ريهام كتب:: يعطيك الف عافيه ع الموضوع

هذا كلام مايطلع الا من واحد كبير والكبير الله

هلا مهند
الله يعافيك يقلبي

هالكلام بالع××× كلام بنات الرجال وبنات القبايل
وبعضه صار بينا قبل كم يووم صح